Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në vijim të protestës mbarëkombëtare në sheshin “Skënderbej”, në emër të familjeve të dëshmorëve të kombit, foli edhe Ruzhdi Keqi, ish-kryetar i Shoqatës “Tirana”. Në fjalën e tij, Keqi theksoi se tubimi i sotëm është një nderim për gjakun e derdhur për liri dhe një zë i përbashkët kundër padrejtësisë.
“Jemi mbledhur për të nderuar gjakun e dëshmorëve tanë. Tirana ndër vite ka qenë djep i mikpritjes së shqiptarëve, që nga viti 1999, kur kjo kryeqytet u bë dritë shprese për ju, vëllezërit tanë të Kosovës, të dëbuar nga gjenocidi serb. Nga kjo tokë, shumë shqiptarë shkuan në vijën e parë të frontit – mes tyre edhe Skerdilajd Llagami e shumë të tjerë,” – u shpreh Keqi.
Ai shtoi se protesta e sotme është edhe për katër udhëheqësit e UÇK-së, të cilët po mbahen padrejtësisht në burgun e Hagës.
“Ata nuk janë kriminelë, por heronj të kombit shqiptar. Bota nuk guxon të mbyllë sytë para padrejtësisë. Shqiptarët janë një, kudo që janë,” – deklaroi Keqi, mes duartrokitjeve të pjesëmarrësve.
Fjalimi i tij u prit me emocione dhe respekt të thellë nga turma, duke forcuar edhe më shumë ndjenjën e bashkimit mbarëkombëtar që karakterizoi protestën e sotme në Tiranë.
