Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Shtetet e Bashkuara të Amerikës kanë shprehur sërish pakënaqësi për mënyrën si po zhvillohen mbledhjet e Këshillit të Sigurimit të OKB-së për raportet e UNMIK-ut, duke i cilësuar ato si “takime për shfaqje dhe për konsum të brendshëm politik”. Në seancën e fundit të Këshillit të Sigurimit, ambasadori amerikan Jeff Bartos tha se këto takime po shndërrohen në platforma politike që nuk i shërbejnë as paqes dhe as sigurisë ndërkombëtare. Ai theksoi se “koha dhe burimet e Këshillit duhet të shpenzohen aty ku janë më të nevojshme” dhe se “UNMIK-u ka tejkaluar rolin e vet që prej vitit 2008”. SHBA kërkoi që raportimet e UNMIK-ut të mbahen një herë në vit dhe pas dyersh të mbyllura, ndërsa e quajti misionin “shpenzim të kotë parash amerikane”, duke kujtuar se Uashingtoni mbulon rreth 25 për qind të fondeve të misioneve paqeruajtëse të OKB-së, përfshirë 10 milionë euro në vit për UNMIK-un. Në seancë, si Ministrja e Jashtme e Kosovës Donika Gërvalla, ashtu edhe homologu serb Marko Gjuriq, shfrytëzuan fjalët e tyre për mesazhe politike të brendshme. Gjuriq e quajti raportin e UNMIK-ut “modest, por domethënës”, ndërsa Gërvalla publikoi në rrjete sociale reagimet e vendeve që e mbështesin pavarësinë e Kosovës, duke anashkaluar kritikat për mungesën e progresit në themelimin e Asociacionit të Komunave me shumicë serbe. Ndërkohë, Rusia dhe Kina kundërshtuan qëndrimin amerikan, duke kërkuar që misioni i UNMIK-ut të vazhdojë me të njëjtin buxhet dhe staf. Sipas vëzhguesve ndërkombëtarë, përfshirë diplomatë perëndimorë, këto seanca po shndërrohen gjithnjë e më shumë në arenë politike për poena të brendshme, në vend se të shërbejnë për stabilitet dhe bashkëpunim rajonal.
