Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Për Klinën me 18 qershor të vitit 1999 erdhi Ora e Madhe e Lirisë pas gjithë atij rrugëtimi shekullor për një gjakim të vetëm, për lirinë e shenjtë që është sublimim i sakrificës së më të shtrenjtëve tanë, të cilët me çmimin e gjakut arritën këtë ditë.
Në ditën e sotme, njëzetegjashtë vjet më parë, në Klinë, si kudo në Kosovë, agoi dielli i dritës dhe i ngrohtësisë së lirisë së shumëpritur dhe shumë shtrenjtë të paguar. Njëzetegjashtë vjet më parë ra perdja e hekurt e me të u zhduk errësira; netët e gjata e të skëterrshme të robërisë shumëshekullore përfunduan me dritën e mëngjesit kombëtar. Gjithnjë do të mbetet i freskët dhe i paharrueshëm përjetimi, të cilin nuk e ka fatin çdo gjeneratë ta ketë: ai i shijes së aromës së lirisë.
Lirinë e fituam me përpjekje dekadash e shekujsh, me arsim, me kulturë, me luftë e me penë, por më shumë se të tjerët, për lirinë që kemi sot, dhanë luftëtarët e lirisë e të pavarësisë, që punuan për ideal, për të parë ditën e sotme. Një pjesë e këtyre bijave dhe bijve të paepur nuk patën jetë për ta parë misionin e përmbushur. U falemi përjetë atyre. U falemi përjetë atyre që ranë në altarin e lirisë, duke bërë flijimin e madhërishëm. U falemi nga zemra sot, në Ditën e Lirisë e të Çlirimit tonë.
Ju uroj këtë Ditë të Lirisë gjithë qytetarëve të komunës së Klinës!
Të rënëve paqe në Dheun e Lirë të Kosovës, brezave jetë të begatshme në liri!
