Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në 70-vjetorin e rënies së atdhetarit, Rifat Berisha dhe bashkëluftëtarëve të tij të afërm Mustafë Berisha, Brahim Berisha dhe Islam Berisha zhvillohen aktivitete tematike e përkujtimore. Sot në Teatrin Kombëtar të Kosovës, nën përkujdesjen e kryetarit të Kosovës, Hashim Thaçi, në orën 12.00 mbahet Akademia përkujtimore, në Prishtinë. Po sot nën përkujdesjen e Kryetarit të Komunës së Malishevës, Ragip Begaj, do të mbahet një tubim përkujtimor për atdhetarin Rifat Berisha dhe familjarët e tij. Tubimi mbahet në fshatin Berishë, duke filluar në orën 14:30.
Më 17 maj të vitit 1949 u vra Rifat Berisha, atdhetar, veprimtari i LANÇ-së. Ka lindur në fshatin Berishë të Drenicës në një familje atdhetare. Ka kryer shkollimin ushtarak në Tiranë. Ka marrë pjesë në Luftën Antifashiste Nacional çlirimtare. Ka qenë pjesëmarrës i Konferencës së Bujanit dhe më vonë i konferencës së Prizrenit ku me shumicë votash të delegatëve shqiptarë serbë e malazezë u mor vendim që Kosova t’ i bashkohej Serbisë e Jugosllavisë. Rifat Berisha më pas nuk ishte pajtuar me këto vendime dhe doli haptas kundër regjimit duke organizuar edhe kryengritje. Së bashku me të afërmit, natën e 16 dhe 17 majit të vitit 1949 ndodhej në fshatin Gajrak të Malishevës. Ishte rrethuar nga forcat e UDB-së dhe pas një qëndrese heroike bien në altarin e atdheut, Rifat Berisha, Mustafë Berisha, Brahim Berisha dhe Islam Berisha.
