Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputetja e AAK-së, Time Kadrijaj, ka kritikuar ashpër Lëvizjen Vetëvendosje, duke e akuzuar se po abuzon me të drejtën kushtetuese për nominimin e kryetarit të Kuvendit, pa e pasur shumicën e nevojshme për ta zgjedhur atë. Kadrijaj tha se Vetëvendosje nuk po angazhohet realisht për të siguruar votat për kandidaten Albulena Haxhiu dhe se kalimi nga votimi i hapur në atë të fshehtë është një strategji për të fshehur mungesën e shumicës. “Nuk e shohim fare angazhimin e Vetëvendosjes për sigurimin e 61 votave. Votimi i fshehtë është vetëm një lojë numrash për të shmangur përgjegjësinë dhe transparencën”, u shpreh Kadrijaj, duke konfirmuar se AAK nuk do të votojë në mënyrë të fshehtë. Ajo theksoi se Aleanca ka ofruar alternativa për zgjidhje dhe është e gatshme të votojë kandidatë të tjerë nga LVV, por vetëm përmes një procesi transparent dhe të hapur. Kadrijaj gjithashtu e lidh këtë situatë me dëmet që po i shkaktohen vendit, duke përmendur mungesën e përfitimeve nga Plani i Rritjes i BE-së. “Mospërfitimet nga fondet e BE-së e kanë emrin e Albin Kurtit dhe Lëvizjes Vetëvendosje. Kosova është i vetmi vend në rajon që nuk ka marrë ende mjetet, për shkak të mosformimit të institucioneve”, theksoi ajo.
