U mbajt mbledhje komemorative në nderim të tre qytetarëve të Malishevës të cilit ishin zhdukur në masakrën e Kralanit

03/04/2025 Institucionet

Sot në Malishevë është mbajtur mbledhja komemorative në nderim të Sabedin Kryeziut, Vehbi Halilajt dhe Mentor Kryeziut, tre qytetarëve të komunës së Malishevës të cilët u zhdukën më 4 prill 1999 në masakrën e Kralanit dhe u identifikuan së fundmi pas analizës së ADN-së.

Ceremonia u organizua nën përkujdesjen e kryetarit të Komunës së Malishevës, Ekrem Kastrati, duke sjellë bashkë familjarë, përfaqësues të institucioneve qendrore e lokale, Shoqata të personave të zhdukur dhe të dala nga lufta e UÇK-së, Policinë e Kosovës, klerit fetar dhe qytetarë të shumtë.

Në fjalën e tij, kryetari Kastrati theksoi dhimbjen e thellë dhe plagën e hapur të të pagjeturve, duke u shprehur: “Në vigjilje të 26-vjetorit të çlirimit, ne ende përballemi me dhimbjen e të pagjeturve. Ju duhet të jeni krenarë për sakrificën e bijve tuaj dhe për durimin që keni treguar për 26 vite.” Ai gjithashtu kërkoi drejtësi për të gjitha krimet e kryera dhe ndriçimin e fatit të të pagjeturve.

Këshilltari i presidentes së Kosovës, Ismet Krasniqi, nënvizoi se kërkimi për drejtësi nuk do të ndalet: “Kjo është pjesë e historisë dhe sakrificës sonë për liri. Janë pritje të gjata, por ne nuk do të rreshtim së kërkuari drejtësi.”

Edhe kryesuesi i Kuvendit Komunal, Argjend Thaçi, e cilësoi këtë dhimbje si pjesë të historisë kombëtare, duke e dënuar përpjekjen e shtetit serb për të fshehur krimet e tij.

Ndërkohë, Andin Hoti, kryesues i Komisionit Qeveritar për Personat e Zhdukur, theksoi se lufta për zbardhjen e fatit të të pagjeturve vazhdon: “Edhe sot, pas 26 vitesh, përballemi me kriminelët që jo vetëm vranë, por edhe zhdukën trupat e të vrarëve.”

Në emër të familjarëve dhe shoqatës “Kujtesa”, Hysen Kryeziu kujtoi përpjekjet e vazhdueshme për gjetjen e personave të zhdukur, duke bërë thirrje për më shumë angazhim institucional. Sipas tij, në Malishevë gjatë luftës u zhdukën 85 persona, nga të cilët 38 ende mbeten të pagjetur.

Në fund të ceremonisë, familjarët falënderuan të gjithë të pranishmit për mbështetjen dhe nderimin e bërë për të afërmit e tyre.

Ceremonia e varrimit të Mentor Kryeziut dhe Vehbi Halilajt do të mbahet të premtën më 4 prill, në Llapçevë dhe Bubavec, ndërsa Sabedin Kryeziu është varrosur më herët.

Kontrolloni gjithashtu

Nesër më 23 tetor promovohet libri “Në emër të gjakut” të autorit Ahmet Prençi

Komuna e Deçanit nën përkujdesjen e kryetarit, z. Bashkim Ramosaj ju fton të merrni pjesë …

Radio Kosova e Lirë 94.2 FM
Kjo web faqe mirëmbahet nga Radio Kosova e Lirë. Materialet dhe informacionet të cilat janë pronë e radios Kosova e Lirë dhe redaksisë “Dëshmorët e UÇK-së” nuk mund të kopjohen, të shtypen, ose të përdoren në çfarëdo forme tjetër për qëllime përfitimi. Radio Kosova e Lirë mban të drejtat e rezervuara sipas dispozitave ligjore për të drejtat e autorit dhe pronës intelektuale. © Copyright 2005 - 2025, Të gjitha të drejtat e rezervuara