Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-komandanti suprem i forcave të NATO-s gjatë fushatës ajrore të vitit 1999, gjenerali amerikan Wesley Clark, pritet të japë dëshminë e tij në gjykatpn speciale në Hagë, në procesin gjyqësor ndaj Hashim Thaçit dhe ish-krerëve të Ushtrisë Çlirimtare të Kosovës. Gjykata ka konfirmuar se dëshmia e Clarkut është autorizuar nga qeveria e Shteteve të Bashkuara të Amerikës dhe pritet të ketë rëndësi të madhe për fazën mbrojtëse të procedurës, që tashmë ka hyrë në vitin e gjashtë. Clark udhëhoqi operacionet ajrore të NATO-s kundër forcave serbe në vitin 1999, me qëllim ndalimin e spastrimit etnik ndaj popullsisë shqiptare në Kosovë. Ai kishte theksuar publikisht gjatë luftës se UÇK-ja, po përpiqej të mbronte civilët e zhvendosur dhe se regjimi i Slobodan Milosheviqit po zbatonte plane të spastrimit etnik. Ndërhyrja e NATO-s, e cila zgjati 78 ditë, çoi në tërheqjen e forcave serbe nga Kosova dhe vendosjen e administratës ndërkombëtare në vend. Clark mbetet një figurë e respektuar në Kosovë për rolin e tij gjatë atyre zhvillimeve. Pas përfundimit të luftës, ai ka mbajtur kontakte me drejtuesit politikë dhe ushtarakë të Kosovës. Clark ka vlerësuar publikisht kontributin e Hashim Thaçit në procesin e çlirimit, të cilin e ka cilësuar si një figurë kyçe të asaj periudhe. Gjeneral Clark është dëshmitari i fundit i mbrojtjes në procesin kundër Thaçit, Kadri Veselit, Jakup Krasniqit dhe Rexhep Selimit. Ai pritet të paraqitet në seancë më 19 nëntor. Dëshmia e Clarkut pritet të kontribuojë në vlerësimin e rrethanave të luftës në Kosovë dhe rolit të UÇK-së në mbrojtjen e civilëve gjatë konfliktit.
