Përmes një statusi në llogarinë e tij në facebook, kryetari i Komunës së Rahovecit z. Smajl Latifi ka përkujtuar 35 vjetorin e vrasjes së dhunshme nga xhelatët serb të heroit të madh të atdheut, profesorit Xhemajli Berisha nga fshati Brestoc i Rahovecit.
Në reagimin e kryetarit Latifi ndër të tjera thuhet:
35 vjet nga vrasja e dhunshme nga xhelatët, e heroit të madh e të heshtur të atdheut, profesorit Xhemajli Berisha nga fshati Brestoc i Rahovecit. Xhemajliu do të mbahet mend për kontributin e tij të jashtëzakonshëm në shërbim të çështjes shqiptare.
Xhemajliu ishte njëri prej udhëheqësve të shquar të Lëvizjes Popullore për Republikën e Kosovës (LPRK). Për shkak se angazhohej, sa në mënyrë të fshehtë e sa në mënyrë të hapur, kundër regjimit pushtues jugosllav, ai ishte arrestuar më 3 prill të vitit 1989 nga UDB-ja dhe pas torturave çnjerëzore ndaj tij, pushoi së rrahuri zemra e profesorit vetëm tre ditë më pas, më 6 prill, për t’u kthyer në simbol të guximit, të qëndresës së pashembullt e i pathyeshmërisë përballë armiqve që ia morën jetën.
E paharruar përgjithmonë është puna dhe shembulli i pashoq i Xhemajliut për lirinë e këtij trualli!
Lavdi emrit dhe veprës së pavdekshme atdhetare të heroit Xhemajli Berisha!
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
