Komisioni Qendror i Zgjedhjeve vazhdon të jetë jofunksional që nga fundi i marsit të këtij viti

Komisioni Qendror i Zgjedhjeve, do të vazhdojë të jetë jofunksional edhe për një kohë. Ky institucion ka mbetur jofunksional që nga fundi i marsit të këtij viti, kur anëtarëve të KQZ-së u ka skaduar mandati. Paqartësia  për ndarjen e anëtarëve të KQZ-së, që ka pasur kryetari i vendit, ka bërë atë që t’i drejtohet Gjykatës Kushtetuese lidhur me ndarjen e mandateve në KQZ. Në Gjykatën Kushtetuese kanë pranuar që lënda tashmë është dërguar nga Thaçi, por nuk dihet se kur do të shqyrtohet, pasi kjo gjykatë nuk ka kuorumin e nevojshëm për ta shqyrtuar. “Kjo kërkesë tashmë është regjistruar në regjistrin e lëndëve. Por lënda do të shqyrtohet pasi që Gjykata të ketë kuorumin e nevojshëm për vendimmarrje”, thuhet në përgjigjen e gjykatës. Ndryshe partitë politike kanë dërguar në Presidencë emrat e propozuar për anëtarë të KQZ-së, përpos AAK-së e Nismës, që si pjesë e koalicionit me PDK-në, do ta kenë një përfaqësues në KQZ.