Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ministri i Mbrojtjes, Ejup Maqedonci, ka reaguar pasi u publikua letra e 30 nëntorit e vitit 2024, ku ai zotohej se do ta respektonte letrën e prillit të vitit 2013 kur Hashim Thaçi si kryeministër garantonte se FSK-ja nuk do të dërgohet në veri. Një letër të tillë Albin Kurti e kishte cilësuar si “tradhti”, duke thënë se “ishte shokuar”, madje kërkonte nga Prokuroria të merrej me të. Por, një garancë të tillë e ka dhënë edhe Ejup Maqedonci, ministri i Kurtit, i cili tha se nuk ka asgjë të re për publikun letra dërguar Komandantit të KFOR-it e nëntorit të vitit 2024, kur Garda Ceremoniale ishte angazhuar në veri të vendit në një ceremoni mortore. Qëllimi i letrës së dërguar është sqaruar edhe më parë dhe ai mbetet i vlefshëm sepse është i vërtetë. Letra në fjalë është dërguar me qëllimin që t’i sqarohen Komandantit të KFOR-it rrethanat e angazhimit të një njësie të FSK-së në njërën nga komunat në veri të vendit, si dhe ta siguroj atë që nuk ka pasur për qëllim në asnjë rast tensionimin e situatës. Në asnjë mënyrë, letra nuk paraqet rizotim dhe nuk mund të interpretohet si rizotim. E ritheksoj, ashtu siç e kam thënë në çdo paraqitje time publike, që personalisht nuk pajtohem me atë zotim, pasi vazhdoj të mendoj se ka qenë zotim i gabuar dhe i dëmshëm për ushtrinë tonë, si dhe me pasoja afatgjata, ka sqaruar.
