Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-kryetari i Gjykatës Kushtetuese të Kosovës, Enver Hasani, ka deklaruar se Kushtetuta nuk e përcakton që zgjedhja e kryetarit të Kuvendit duhet të bëhet me votë të fshehtë. Në një intervistë për “Euronews Albania”, Hasani sqaroi se një ndryshim i mënyrës së votimit nuk mund të ndodhë gjatë procesit zgjedhor. Duke iu referuar aktgjykimit të vitit 2014 të Gjykatës Kushtetuese, të cilin ai e ka hartuar, Hasani theksoi se ky dokument nuk përmend askund domosdoshmërinë e votimit të fshehtë për pozitën e kryeparlamentarit. Sipas tij, kjo çështje rregullohet përmes Kushtetutës, ligjeve përkatëse dhe Rregullores së Kuvendit, dhe asnjëra nga këto nuk e përmend votën e fshehtë për këtë rast. Gjykata ka treguar qartë mënyrat e votimit në Kuvend, por nuk ka thënë që zgjedhja e kryetarit duhet të bëhet me votë të fshehtë. Kushtetuta e thotë këtë vetëm për presidentin, deklaroi Hasani. Ai sqaroi se vendimi për mënyrën e votimit mund të ishte bërë në momentin e caktimit të seancës konstituive më 8 prill, përmes një marrëveshjeje politike mes partive. “Tani nuk mund të ndërrohet ajo. Kjo është tërësisht kaotike dhe kundër rregullave parlamentare,” përfundoi ai.
