Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Eksperti i marrëdhënieve ndërkombëtare dhe sigurisë, Adrian Shtuni, ka komentuar zhvillimet e fundit politike në Kosovë dhe raportet me Shtetet e Bashkuara të Amerikës. Gjatë një analize, ai u shpreh se Kosova duhet të reflektojë seriozisht mbi sjelljen e deritanishme politike dhe të ndryshojë qasjen ndaj partnerit kryesor strategjik, SHBA-së. Sipas Shtunit, pavarësisht se ish-presidenti amerikan Donald Trump ka lënë të kuptohet se mund të angazhohet sërish në çështjen e Kosovës, vendi nuk duhet të qëndrojë në “vetë-hipnozë” duke pritur zgjidhje nga jashtë. Ai theksoi se është urgjente që të krijohet një qeveri funksionale, duke nxjerrë mësime nga sjellja problematike dhe mungesa e bashkëpunimit e qeverisë së kaluar. “Nëse nuk ka një vetëdijësim dhe një ndryshim të qasjes ndaj SHBA-së, atëherë është e kotë që i njëjti kryeministër të pretendojë të vijë në pushtet. Ai do të jetë i pafuqishëm dhe do ta mbajë Kosovën peng. Duhet të vendoset Kosova në radhë të parë, jo doktrina personale politike,” u shpreh Shtuni. Ai shtoi se nuk ka rëndësi se çfarë mendon një lider politik nëse ai nuk arrin të krijojë një konsensus minimal për të formuar qeverinë. “Nëse nuk është i gatshëm të bëjë kompromis, duhet të hapë rrugën. Kosova nuk guxon të rrijë në vendnumëro,” përfundoi Shtuni.
