Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Prokuroria Speciale e Kosovës ka lëshuar urdhërarrest vendor dhe ndërkombëtar ndaj Milan Radojiçiq dhe 10 personave të tjerë në lidhje me organizimin e barrikadave në veri të vendit gjatë dhjetorit 2022. Gjithsej 46 persona janë nën hetime për këtë rast, i cili po hetohet nga prokurori Admir Shala. Pjesë e hetimeve është edhe kryetari aktual i Listës Serbe, Zlatan Elek, i cili është ftuar për intervistim nga Prokuroria Speciale. Megjithatë, për shkak të problemeve shëndetësore të avokatit të tij, intervistimi është shtyrë për një datë tjetër. Ngjarjet e dhjetorit 2022 nisën pas arrestimit të ish-policit serb, Dejan Pantiq, i dyshuar për organizimin e një sulmi ndaj zyrave të Komisionit Qendror të Zgjedhjeve në veri të Mitrovicës, me qëllim për të sabotuar zgjedhjet lokale të planifikuara për 18 dhjetor. Arrestimi i tij u pasua me ngritjen e barrikadave nga struktura paralele serbe, të cilat për 18 ditë bllokuan rrugët kryesore në veri, duke sfiduar autoritetet e sigurisë së Kosovës. Gjatë kësaj kohe, Policia e Kosovës, për shkak të mungesës së mjeteve ajrore, si helikopterë, u detyrua të qëndrojë e izoluar në pikëkalimin kufitar në Jarinje, bashkë me të arrestuarin. Lëshimi i urdhërarrestit ndaj Milan Radojiçiq, një figure kyçe në strukturat paralele serbe në veri të Kosovës dhe shpesh i konsideruar si “njeriu i Beogradit në veri”, sinjalizon një qasje më agresive të autoriteteve të drejtësisë në Kosovë për ndëshkimin e akteve që rrezikojnë rendin dhe sigurinë kushtetuese të vendit.
