Kastrati: Në vitet në vijim do të jemi të përkushtuar për urbanizimin e fshatrave

Kryetari i Komunës së Malishevës, Ekrem Kastrati, gjatë mbajtjes së dëgjimeve buxhetore në fshatra, deklaroi se investimet në vitet e ardhshme do të fokusohen në urbanizimin e zonave rurale. Këtë e theksoi gjatë takimeve me banorët e Këshillave Lokal në Terpezë, Tërpezë e Poshtme, Berishë dhe Fshat i Ri.

Kastrati, së bashku me drejtorin e Drejtorisë për Buxhet dhe Financa, Blerim Thaçi, dhe Zyrtaren Kryesore Financiare, Valentinë Krasniqi, prezantuan Qarkoren e Dytë Buxhetore për periudhën 2026–2028, me theks të veçantë në planifikimin e buxhetit për vitin 2026.

Drejtori Thaçi bëri prezantimin e buxhetit, duke theksuar investimet kapitale. Sipas tij, krahas buxhetit të planifikuar dhe të hyrave vetanake të komunës, për vitin 2026 planifikohet të investohen rreth gjashtë milionë euro në projekte kapitale.

Kryetari Kastrati tha se, duke qenë se shumica e projekteve në qytet dhe obligimet e tjera po realizohen brenda vitit, buxheti do të orientohet drejt urbanizimit të fshatrave. Ky orientim do të bëhet në përputhje me mundësitë e komunës dhe kërkesat e vetë qytetarëve, me qëllim të përmirësimit të mirëqenies dhe nxitjen e zhvillimit ekonomik.

Kërkesat kryesore të qytetarëve ishin për investime në infrastrukturë, pa lënë anash edhe bujqësinë, zhvillimin e turizmit, sistemet e ujësjellësit dhe sektorë të tjerë që ndikojnë drejtpërdrejt në zhvillimin lokal. Konfiguracioni i terrenit dhe malet e larta në këtë zonë e bëjnë të mundur zhvillimin e bujqësisë, blegtorisë dhe veçanërisht të turizmit malor.