Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Gjykata Speciale në Hagë ka caktuar datën 16 korrik 2025 për shpalljen e vendimit lidhur me mocionin e përbashkët të ekipeve mbrojtëse të ish-krerëve të Ushtrisë Çlirimtare të Kosovës: Hashim Thaçi, Kadri Veseli, Jakup Krasniqi dhe Rexhep Selimi. Mocioni kërkon rrëzimin e disa pjesëve të aktakuzës për krime lufte dhe krime kundër njerëzimit. Në lidhje me këtë zhvillim ka reaguar Organizata e Veteranëve të Luftës së UÇK-së (OVL-UÇK), e cila e ka cilësuar datën e vendimit si një test për drejtësinë dhe për të vërtetën. “I bëjmë thirrje trupit gjykues që në këtë vendim të rëndësishëm të mos i mbyllë sytë para së vërtetës së luftës sonë çlirimtare. Ky është një moment vendimtar që kërkon respektim të parimeve të drejtësisë me ndershmëri”, thuhet në reagimin e OVL-UÇK-së. Organizata thekson më tej se çdo përpjekje për ta njollosur luftën e UÇK-së është një padrejtësi e madhe ndaj popullit të Kosovës dhe historisë së saj. Vendimi i 16 korrikut pritet me interes të madh si nga opinioni publik në Kosovë, ashtu edhe nga komuniteti ndërkombëtar, pasi do të tregojë drejtimin e mëtejmë të procesit gjyqësor ndaj ish-udhëheqësve të luftës.
