Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Lidhja e Bizneseve të Kosovës (LBK) ka shprehur shqetësimin e saj të thellë lidhur me vendimet e Qeverisë në detyrë dhe të Zyrës së Rregullatorit për Energji (ZRrE), të cilat, sipas saj, po e ekspozojnë ekonominë e vendit ndaj rrezikut të destabilizimit afatgjatë.
Në një komunikatë për media, LBK thekson se vendimet për kalimin e detyruar të bizneseve në tregun e lirë të energjisë janë në kundërshtim me vendimet e formës së prerë të gjykatave, cenojnë interesin strategjik të vendit dhe kanë shkaktuar dëme të konsiderueshme për sektorin prodhues, punësimin dhe qëndrueshmërinë financiare.
“ZRrE nuk ka as mandat ligjor e as autoritet institucional për të shpërfillur vendimet e gjykatave apo për të vepruar në kundërshtim me rendin juridik të Republikës së Kosovës,” thuhet në reagimin e LBK-së.
Sipas kësaj organizate, mungesa e kontrollit parlamentar dhe e përgjegjësisë institucionale po i lejon ZRrE-së dhe Qeverisë të marrin vendime që ndikojnë drejtpërdrejt në të drejtat ligjore të bizneseve, sigurinë e investimeve dhe konkurrencën e ndershme në treg.
LBK ka kërkuar pezullimin e menjëhershëm të vendimeve për kalimin në tregun e lirë të energjisë, respektimin e vendimeve gjyqësore dhe nisjen e një dialogu institucional e gjithëpërfshirës me përfaqësues të sektorit privat.
Në fund të komunikatës, LBK paralajmëron se vazhdimi i kësaj qasjeje rrezikon falimentime masive të ndërmarrjeve vendore dhe tkurrje të kapaciteteve prodhuese në Kosovë.
