Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në një reagim të gjatë dhe të drejtpërdrejtë ndaj ish-kryetarit të Gjykatës Kushtetuese, Enver Hasani, ish-nënkryetari i kësaj gjykate Kadri Kryeziu, ka akuzuar Hasanin se me vendimet e tij ka krijuar një “kushtetutë paralele” që ka dëmtuar rëndë rendin juridik të Republikës së Kosovës.
“Ti je fajtori kryesor pse Republika e Kosovës sot duhet të funksionojë në këtë paqartësi të paprecedentë juridike, që jo pak herë rrëshqet deri në kufijtë e absurdit,” shkruan ai, duke e cilësuar Aktgjykimin e vitit 2014 si “fillimin e agonisë kushtetuese”.
Duke iu referuar vendimeve të vitit 2011 për zgjedhjen e presidentit dhe atij të vitit 2014 për përbërjen e Kuvendit, ai thotë: “Ti ke krijuar kushtetutë paralele që dhunshëm ekziston krahas asaj për të cilën kanë votuar përfaqësuesit e popullit.”
Ai e akuzon Hasanin se ka shpikur kuorume që nuk ekzistojnë në kushtetutë dhe ka përdorur rregullore e praktika administrative për të ndikuar vendimmarrjen: “E ke shpikur kuorumin prej 80 deputetësh për zgjedhjen e Presidentit, thjesht për ta anuluar zgjedhjen e Behgjet Pacollit, sepse e urreje dhe doje ta poshtëroje.”
Në fund të replikës, ai përshëndet vendimin e fundit të Gjykatës Kushtetuese që përcakton afat për konstituimin e Kuvendit, duke thënë se “çmenduria, kaosi dhe papërgjegjësia duhet të kenë një kufi”.
