Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Mbrojtja e Rexhep Selimit ka kërkuar nga trupi gjykues i Dhomave të Specializuara që të vendosë masa për kufizimin e marrjes në pyetje të dëshmitarëve të mbrojtjes nga Prokuroria dhe palët e tjera në procesin gjyqësor ndaj tij dhe bashkë të akuzuarve Thaçi, Veseli e Krasniqi.
Në parashtrimin e dorëzuar më 17 korrik 2025, mbrojtja kërkon që pyetjet të kufizohen vetëm në çështje që dalin nga pyetja direkte, besueshmëria e dëshmitarëve dhe prova relevante që janë trajtuar në mënyrë të konsiderueshme gjatë fazës së Prokurorisë. Po ashtu, kërkohet ndalimi i paraqitjes së provave që lidhen me aktet dhe sjelljen e të akuzuarve të tjerë, nëse dëshmitari nuk është thirrur nga ata, raporton Betimi për Drejtësi.
Mbrojtja argumenton se lejimi i pyetjeve jashtë këtyre kufijve do të përbënte rrezik për zgjerimin e akuzave ndaj Selimit, i cili ka vendosur të mos paraqesë një çështje mbrojtëse. Ajo kërkon gjithashtu të lejohet rihapja e marrjes në pyetje nëse gjatë pyetjeve të Prokurorisë dalin çështje të reja që ndikojnë drejtpërdrejt në rastin e tij.
Prokuroria e ka përfunduar paraqitjen e provave më 15 prill 2025, ndërsa më 16 korrik, trupi gjykues ka refuzuar mocionin e mbrojtjes për rrëzimin e disa akuzave që lidhen me ngjarje jashtë periudhës kohore të përcaktuar në aktakuzë.
