Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Dyshime serioze janë ngritur për praninë e dronëve të paidentifikuar, që mendohet se i përkasin Serbisë, mbi disa institucione të ndjeshme në territorin e Kosovës. Sipas burimeve të televizionit Dukagjini, më shumë se një muaj më parë, këto mjete ajrore fluturuan mbi Burgun e Sigurisë së Lartë dhe Aeroportin e Dumoshit, duke u përshkruar si të ngjashëm me dronët bujqësorë në madhësi. Këto fluturime të paautorizuara janë cilësuar shqetësuese, sidomos për faktin se bëhet fjalë për objekte me rëndësi të lartë strategjike – burgu ku mbahen edhe të dyshuar për sulmin e armatosur në Banjskë, dhe ish-aeroporti i Dumoshit, tashmë nën kontrollin e Forcës së Sigurisë së Kosovës. KFOR-i, i cili është përgjegjës për mbikëqyrjen e hapësirës ajrore, ka konfirmuar fillimin e monitorimit dhe ka njoftuar se nuk është identifikuar ndonjë kërcënim i drejtpërdrejtë për sigurinë. Megjithatë, patrullimet janë intensifikuar në bashkëpunim me Policinë e Kosovës. Drejtori i Policisë së Kosovës, Gazmend Hoxha, ka konfirmuar se janë vërejtur edhe raste të tjera të dronëve të dyshimtë. Edhe Aviacioni Civil i Kosovës ka konfirmuar se është njoftuar për këto fluturime të paautorizuara në hapësirën ajrore të Kosovës, duke i vlerësuar ato si shkelje serioze të sigurisë ajrore.
