Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Eugen Cakolli nga KDI ka paralajmëruar se vendi po shkon drejt një krize të re kushtetuese, më të thellë se ajo e zgjedhjes së kryetarit të Kuvendit. Ai ka theksuar se pas konsumimit të të gjitha kandidaturave nga komuniteti serb, Kuvendi mund të mbetet pa mundësi të vazhdojë funksionimin. Procedura aktuale e zgjedhjes së nënkryetarëve, sipas Cakollit, nuk është në përputhje me aktgjykimet e Gjykatës Kushtetuese. Si pasojë, situata mund të çojë në një rast të ri në Kushtetuese ose, në skenarin tjetër, në zgjedhje të reja pas skadimit të afatit 30-ditor. Ai sugjeron që skenari më i favorshëm do të ishte anulimi dhe rikthimi i procedurës në pikën zero, duke u kthyer te praktika e votimit të nënkryetarëve nga komunitetet në pako. Megjithatë, Cakolli paralajmëron se në rastin më të keq mund të krijohet precedent për një shumicë të dyfishtë në propozimin dhe zgjedhjen e nënkryetarëve, gjë që sipas tij duhet shmangur me çdo kusht. Situata, sipas tij, rrezikon stabilitetin institucional dhe mund të ketë pasoja serioze për funksionimin e Kuvendit në periudhën në vijim.
