Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-ministri i Mjedisit dhe profesori universitar, Ethem Çeku, ka publikuar sot një shkrim reflektues me titull “Shqipëria – ndërgjegjja kombëtare dhe arkitektura etike e lirisë shqiptare”, ku thekson rolin moral, historik dhe shpirtëror të Shqipërisë në ruajtjen e unitetit dhe dinjitetit kombëtar. Në këtë analizë filozofiko-kombëtare, Çeku thekson se Shqipëria nuk është vetëm një realitet shtetëror, por “substrati moral dhe ndërgjegjja ekzistenciale e shqiptarëve”, përmes së cilës ideja e kombit ka mbijetuar përtej ndarjeve territoriale dhe tronditjeve historike. Sipas tij, që nga pavarësia e vitit 1912, Shqipëria ka qenë “qendra shpirtërore e identitetit kombëtar”, duke mishëruar parimet e bashkimit, dinjitetit dhe lirisë. “Në qenien kombëtare shqiptare, liria dhe drejtësia nuk janë nocione të ndara, por dy dimensione të një parimi të vetëm moral. Liria pa drejtësi humb substancën e saj etike, ndërsa drejtësia pa liri kthehet në formalizëm të zbrazët,” – shkruan Çeku. Ai e përkufizon Shqipërinë si “arkitekturën morale të kombit”, ku sakrifica është shndërruar në ideal dhe dhimbja në vetëdije, ndërsa shteti – në një shprehje të shpirtit të lirë të popullit. Në vijim, ish-ministri Çeku vlerëson qëndrimin e institucioneve të Shqipërisë dhe të Kryeministrit shqiptar në mbështetje të protestës për lirimin e çlirimtarëve të Kosovës, duke e cilësuar atë si “shprehje të solidaritetit kombëtar dhe të bashkimit shpirtëror shqiptar. Çeku e mbyll reflektimin e tij me theksin se liria dhe drejtësia janë “dy anët e të njëjtës ndershmëri kombëtare” që Shqipëria e ka ruajtur si amanet të përjetshëm të historisë shqiptare.
