Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ambasada amerikane në Prishtinë ka bërë thirrje urgjente për udhëheqësit politikë të Kosovës që ta tejkalojnë ngërçin politik që po pengon formimin e institucioneve të reja dhe po dëmton zhvillimin e vendit. Në një përgjigje me shkrim për Radion Evropa e Lirë, zëdhënësi i Ambasadës theksoi se bllokada e vazhdueshme po i kushton Kosovës me humbje të mëdha të mundësive, dhe se partitë parlamentare duhet të punojnë së bashku për t’i themeluar institucionet në përputhje me Kushtetutën dhe vendimet e Gjykatës Kushtetuese. “Kjo bllokadë e vazhdueshme politike po i kushton Kosovës me humbje të mundësive. Është koha që udhëheqja të vendosë përparësi tek progresi dhe stabiliteti, për të mirën e të gjithë qytetarëve,” u tha nga Ambasada. Në këtë situatë, partitë e mëdha parlamentare vazhdojnë të mbajnë qëndrime të kundërta lidhur me zgjedhjen e kryeparlamentarit, duke bërë që ngërçi politik të vazhdojë, ndërsa afati ligjor për konstituimin e Kuvendit skadon më 18 shtator. Kjo krizë politike ka shkaktuar një bllokadë të gjatë në procesin e qeverisjes, duke rrezikuar stabilitetin dhe zhvillimin e vendit.
