Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputeti i PDK-së, Bedri Hamza, ka reaguar pas pezullimit të dialogut strategjik me Kosovën nga ana e Shteteve të Bashkuara të Amerikës, duke e cilësuar këtë moment si një nga periudhat më të errëta në historinë e re të vendit. Hamza theksoi se SHBA-të mbeten aleati më i rëndësishëm dhe pasuria më e madhe e Kosovës, me të cilat janë bërë hapat më të rëndësishëm të shtetndërtimit – nga rezistenca paqësore, lufta, liria deri te pavarësia. “Pezullimi i dialogut strategjik me Kosovën, si pasojë e veprimeve të Qeverisë, shënon periudhën më të errët në historinë e re të Kosovës. Ky është lajm shumë i keq për ne, por njëkohësisht jam i bindur se nuk ka qenë vendim aspak i lehtë as për qeverinë amerikane”, tha Hamza. Ai paralajmëroi se shteti dhe populli i Kosovës janë përballë një sfide ekzistenciale, pasi marrëdhëniet me SHBA-në po rrezikohen seriozisht dhe bashkë me to edhe e ardhmja e vendit. “Këto marrëdhënie nuk janë vetëm çështje diplomacie, por janë garancia më e fortë për ekzistencën, stabilitetin dhe të ardhmen e Republikës së Kosovës. Periudhës së mjegullës, kaosit institucional, polarizimit me aleatë dhe ofendimeve ndaj zyrtarëve amerikanë, po i vjen fundi”, theksoi ai.
