Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ministri në detyrë i Mbrojtjes, Ejup Maqedonci, në një intervistë për transmetuesin polak TVP World ka folur për procesin gjyqësor ndaj ish-krerëve të Ushtrisë Çlirimtare të Kosovës në Hagë, duke theksuar se lufta e UÇK-së ishte “e drejtë dhe e pastër”. Ai u shpreh se akuzat ndaj drejtuesve të UÇK-së përfaqësojnë përpjekjen e Serbisë për të minuar shtetësinë e Kosovës dhe për të vënë në pikëpyetje legjitimitetin e intervenimit të NATO-s, që ndali gjenocidin serb në Kosovë. “Serbia po vazhdon të mbajë qasje hegjemoniste ndaj Kosovës dhe vendeve fqinje, duke zhvilluar luftë hibride dhe duke strehuar e mos dorëzuar pjesëtarët e grupit paramilitar që tentoi aneksimin e pjesës veriore të Kosovës dhe kreu akte terroriste kundër institucioneve tona,” tha Maqedonci. Ministri foli edhe për luftën në Ukrainë, duke nënvizuar mbështetjen që Kosova i ka dhënë dhe po i jep popullit ukrainas në përballjen me agresionin rus. Ai gjithashtu theksoi investimet e Qeverisë së Kosovës në zhvillimin e kapaciteteve mbrojtëse sipas standardeve të NATO-s, duke siguruar ndërveprueshmëri me aleatët dhe duke përgatitur vendin për anëtarësim në NATO. Në fund, Maqedonci theksoi se Republika e Kosovës mbetet e përkushtuar në rrugën drejt anëtarësimit në NATO dhe Bashkimin Evropian, si dhe në forcimin e vlerave demokratike.
