Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Eurodeputeti austriak Lukas Mandl ka kërkuar publikisht heqjen e menjëhershme të masave ndëshkuese të BE-së ndaj Kosovës, duke i cilësuar ato si të gabuara në thelb dhe të pajustifikueshme në rrethanat aktuale politike në rajon. “Masat kundër Republikës së Kosovës kanë qenë gjithmonë një ide e keqe. Ato duhet të hiqen menjëherë dhe plotësisht. Në Bruksel, disa që më herët nuk ishin plotësisht të informuar për situatën, tanimë, për shkak të zhvillimeve në Serbi, po e shohin absurditetin që regjimi i Vuçiqit nuk është sanksionuar, ndërsa Kosova është vënë në shënjestër”, deklaroi Mandl. Kërkesa e tij vjen në një kohë kur pjesa më e madhe e institucioneve të BE-së po e rishikojnë qëndrimin ndaj masave, sidomos pas rekomandimit të ish-shefit të diplomacisë së BE-së, Josep Borrell, i cili kërkoi heqjen e tyre para përfundimit të mandatit. Megjithatë, disa vende anëtare nuk u pajtuan, duke bërë që masat të mbeten ende në fuqi. Mandl nënvizoi gjithashtu dallimin e madh në ecurinë demokratike mes Kosovës dhe Serbisë. Sipas tij, Kosova ka dëshmuar pjekuri politike dhe stabilitet demokratik, ndërsa Serbia ka bërë hapa të ndjeshëm prapa, duke vështirësuar perspektivën e saj evropiane. Mandl mbetet një nga zërat më të fuqishëm pro-Kosovë në Parlamentin Evropian, duke kërkuar që vendi të trajtohet me standarde të drejta dhe të bazuara në parime.
