Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Nismës Socialdemokrate, Fatmir Limaj, ka deklaruar se partia e tij është e gatshme të ofrojë tri vota në Kuvend për të ndihmuar në tejkalimin e krizës institucionale që ka zgjatur prej disa muajsh. Limaj ka shprehur bindjen se së shpejti do të arrihet një marrëveshje politike dhe Kosova do të formojë institucionet e reja. “Partia e parë duhet të vrapojë të bëjë shumicën parlamentare, ndërsa të tjerat duhet të lënë anash egot individuale dhe të ofrojnë bashkëpunimin”, u shpreh ai. Limaj theksoi se Nisma nuk kërkon pjesëmarrje në qeverisje dhe nuk ka interesa për pozita, por do të kontribuojë në partneritet parlamentar për të ndihmuar vendin të dalë nga bllokada. “Nisma nuk është pjesë e problemit, por e zgjidhjes. Ne do të japim kontributin tonë në Kuvend, por nuk synojmë të jemi pjesë e qeverisë”, tha ai. “Duhet të hyjmë në fazën e negociatave për marrëveshje politike, siç ka ndodhur gjithmonë në këto raste”, përfundoi Limaj.
