Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kontingjenti i Forcës së Sigurisë së Kosovës me kapacitete mjekësore ROL 1, që nga 24 janari, i është bashkuar vendeve partnere të NATO-s në Ushtrimin Fushor “KFOR 36”, i cili po realizohet në JMRC Hohenfels, në Gjermani. Sipas njoftimit zyrtar të FSK-së, ekipi kosovar po ofron mbështetje reale mjekësore për të gjitha ushtritë pjesëmarrëse, në bashkëpunim të ngushtë me shërbimin mjekësor të Ushtrisë Amerikane. Gjatë ushtrimit, pjesëtarët e FSK-së po marrin pjesë në trajnime të fushave specialistike dhe janë të përfshirë në skenarët operativë të “KFOR 36”, me synim rritjen e ndërveprueshmërisë dhe shkëmbimin e përvojave profesionale me partnerët ndërkombëtarë. Në kuadër të aktiviteteve trajnuese po zhvillohen edhe ligjërata në fushën e mjekësisë ushtarake, të fokusuara në prezantimin e PSO ROL 1, evakuimin mjekësor, Combat Life Saver (CLS), shëndetin mendor, menaxhimin e lëndimeve dhe suturën e plagëve, trajtimin e traumave të kokës, marrjen e mostrave të gjakut për laborator emergjent dhe vendosjen e vijës venoze. “Ushtarakët tanë po tregojnë disiplinë, profesionalizëm dhe ndërveprueshmëri me partnerët për të shërbyer paqes dhe sigurisë globale”, thuhet në njoftim.
