Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Përfaqësuesja e Lartë e Bashkimit Evropian për Politikë të Jashtme dhe Siguri, Kaja Kallas, deklaroi në Sarajevë se ka ardhur koha që mbikëqyrja ndërkombëtare në Bosnje e Hercegovinë të përfundojë.Gjatë vizitës zyrtare të së hënës, ajo theksoi se ky proces mund të ndodhë vetëm kur vendi të jetë i gatshëm të marrë vetë vendime dhe të garantojë stabilitet institucional. Kallas vizitoi kampin Butmir pranë Sarajevës, ku ndodhen trupat e Misionit të BE-së për Paqe, EUFOR, të cilët kanë mandat për të përdorur forcën në rast rreziku ndaj sigurisë. Ajo vlerësoi se ngjarjet e fundit në Kuvendin Popullor të Republikës Sërpska përbëjnë një mundësi për qetësimin e tensioneve politike. “Zgjedhjet e lira dhe të ndershme mund të rivendosin besimin e qytetarëve në institucionet lokale”, tha Kallas. Kuvendi i Republikës Sërpska kishte miratuar më 18 tetor disa ligje që bien ndesh me vendimet e Gjykatës Kushtetuese të Bosnjës. Kallas kujtoi se BE-ja reagoi në mars ndaj kërcënimeve për rendin kushtetues, duke forcuar praninë e trupave evropiane në vend. Ajo përshëndeti gjithashtu zgjatjen e mandatit të EUFOR-it nga Këshilli i Sigurimit i OKB-së dhe nënvizoi se Bosnja ka përfituar ndjeshëm nga përkushtimi afatgjatë i BE-së për siguri dhe paqe. Në fund, Kallas foli për Programin e Reformave që mund t’i sigurojë Bosnjës mbi një miliard euro nga Plani i Rritjes së BE-së, ndonëse vonesat e vendit shkaktuan ulje të fondeve prej 108 milionë eurosh.
