Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Katër krerët e lartë të UÇK-së, Hashim Thaçi, Jakup Krasniqi, Kadri Veseli dhe Rexhep Selimi, të cilët po përballen me akuza për krime lufte, në Hagë, kanë vendosur nënshkrimet e tyre në një letër të cilën ia kanë drejtuar Ombudspersonit të Gjykatës Speciale, Pietro Spera. Ata rikujtojnë se Gjykata Speciale, e cila është krijuar mbi pretendimet e Raportit të Dick Martyt, duhet të marrë një përgjigje adekuate. Po ashtu janë ankuar se procesi ndaj tyre po përcillet me parregullsi. Gjykata Speciale nuk është duke respektuar Kushtetutën e Republikës së Kosovës, dhe po përpiqet të imponojë standarde tjera juridike duke potencuar se kjo përbën shkelje flagrante të parimit juridik, lirive, si dhe të drejtave të njeriut. Mungesa e plotë e mbikëqyrjes demokratike rrezikon të shndërrojë këtë gjykatë në institucion të dirigjuar dhe jo institucion drejtësie që mbështetet në fakte e dëshmi, thuhet mes tjerash në ankesën e krerëve të UÇK-së. Ata kanë përmendur vonesat e stërzgjatura të procesit, materialet e vonuara, redaktimet e tepruara duke thënë se kjo e vonon procesin gjyqësor dhe rrezikon parimin e barazisë së palëve në proces, pasi me këtë dinamikë gjykimi mund të zgjasë deri në 10 vjet.
