Kryeministri në detyrë, Albin Kurti, uron Bedri Hamzën për zgjedhjen si kryetar i PDK-së

Kryeministri në detyrë i Kosovës, Albin Kurti, ka uruar Bedri Hamzën për zgjedhjen e tij në krye të Partisë Demokratike të Kosovës. Në një reagim publik, Kurti ka theksuar rëndësinë e proceseve të rregullta zgjedhore brenda partive politike dhe rolin e bashkëpunimit ndërpartiak për interesin e përgjithshëm të vendit.

“Proceset e brendshme zgjedhore, si dhe bashkëpunimi i ndërsjellë ndërmjet spektrit të gjerë politik, kurdoherë në funksion të interesit publik, janë parime thelbësore për funksionimin dhe avancimin e shtetit tonë,” ka deklaruar ai.

Kurti ka shtuar se do të vazhdojë angazhimin e tij për bashkëpunim korrekt me subjektet politike, në përputhje me vullnetin e qytetarëve dhe përgjegjësitë që kërkon shërbimi ndaj Republikës së Kosovës.

Zgjedhja e Bedri Hamzës në krye të PDK-së është pritur me reagime të shumta në skenën politike, ndërsa ky është urimi i parë publik nga ana e kreut të ekzekutivit në detyrë.