Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Kryetari i Komunës së Shtimes, z. Naim Ismajli ka pritur në një takim pune përfaqësuesit e bashkësive fetare, në komunën e Shtimes, z. Isa Tërshani-kryetar i BI, në Shtime dhe z.Trajko Vllajkoviq-prift i kishës ortodokse serbe për Shtimen.
Në këtë takim kanë marrë pjesë edhe drejtoresha e Drejtorisë për Shërbime Publike(DSHP) znj. Ardiana Rama, drejtoresha e Drejtorisë së Kulturës (DA ) znj. Fatmire Ferati, përfaqësuesit e Eulex-it, të Policisë së Kosovës dhe përfaqësuesit e UNDP-së.
Prifti Trajko Vllajkoviq ka falënderuar kryetarin Ismajli për iniciativën që ka marrë komuna e Shtimes për pastrimin e varrezave ortodokse dhe rregullimin e dyerve hyrëse të kishës, në Shtime. Edhe z. Isa Tërshani-kryetar i BI, në Shtime ka falënderuar kryetarin për realizimin e këtij aktiviteti duke e vlerësuar këtë iniciativë si kontribut i tolerancës fetare.
Në këtë takim është biseduar për mundësinë e aplikimit në Projektin “ Ngritja e besimit përmes mbrojtjes kulturore në Kosovë “, financuar nga BE-ja përmes UNDP-së.
Kryetari z. Naim Ismajli ka mbështetur dhe përkrahur iniciativën për aplikim në projektin e lartcekur duke potencuar nevojën e restaurimit të objektit të kishës, në Shtime dhe të një objekti të xhamisë, në fshatin Vojnovc duke shtuar se këto projekte i kontribuojnë promovimit të vlerave kulturore dhe njëherit ndikojnë pozitivisht në raportet ndëretnike, në komunën e Shtimes.
Drejtoresha e DK-së, znj. Fatmire Ferati ka bërë të ditur se gjatë këtij viti nga komuna e Shtimes, nga Ministria për Kulturë, Rini dhe Sport, janë marrë nën mbrojtje 11 objekte të trashëgimisë kulturore, duke përfshirë objekte fetare.
Është diskutuar edhe për kriteret për përzgjedhjen e projekteve që do t’i përgatisin komunat duke potencuar se komuna e përzgjedhur duhet të ketë së paku dy objekte të besimeve të ndryshme fetare.
