Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Deputetja e Lidhjes Demokratike të Kosovës Hykmete Bajrami, ka reaguar pas vendimit të Bashkimit Evropian për të mos zhvilluar takime në objektin e Qeverisë me kryeministrin në largim, Albin Kurti, dhe me deputetët e tjerë që njëkohësisht mbajnë edhe pozita ekzekutive. Bajrami kujtoi se kjo çështje është ngritur nga LDK edhe përmes kallëzimeve penale, duke kërkuar respektim të rendit ligjor dhe kushtetues. “Albin Kurti me shpejtësi po e çon drejt kolapsit shtetin e Kosovës. Sot u publikua edhe letra e nënshkruar nga ambasadori i BE-së që izolon deputetin Kurti dhe gjithë shkelësit e tjerë të ligjit e Kushtetutës që po mbajnë kundërligjshëm pozitat qeveritare. BE ka vendosur të mos e takojë as Kurtin dhe asnjë deputet tjetër që ushtron edhe pozitë ekzekutive në Qeverinë në largim”, shkroi ajo. Deputetja e LDK-së kujtoi se më 8 maj ky subjekt ka dorëzuar në Prokurorinë Speciale 17 kallëzime penale ndaj deputetëve që njëkohësisht ushtrojnë edhe detyra ministrore, duke shtuar se ende pritet reagimi i institucioneve të drejtësisë. “Tani është kristal e qartë që z. Kurti ka dështuar të jetësojë besimin e qytetarëve. Ka dështuar të ndërtojë marrëveshje politike dhe ka bllokuar Qeverinë e Kuvendin. Bllokuesi, dështuesi dhe fajtori për këtë situatë është Albin Kurti dhe Vetëvendosja”, ka theksuar Bajrami.
