Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Më 25 nëntor 1997, në Vajnik të Skenderajt, u shkrua një nga faqet më të ndritshme dhe më tronditëse të epopeut të lirisë shqiptare. Në një ditë që do të mbetet përjetësisht e gdhendur në kujtesën kombëtare, forcat e Ushtrisë Çlirimtare të Kosovës, të udhëhequra nga Komandanti Legjendar Adem Jashari, u përballën me forcat policore serbe në një betejë që dëshmoi vendosmërinë e pathyeshme të Drenicës. Forcat serbe atë mëngjes kishin rrethuar lagjen Binakaj të fshatit Vajnik, me synimin kriminal për të arrestuar luftëtarin e paepur të UÇK-së, Abedin Rexhën – “Sandokani”, simboli i guximit dhe i qëndresës. Por, ashtu siç ndodhte gjithmonë në Drenicën heroike, rrethimi nuk u prit me frikë, por me përballje. Abedin Rexha, bashkë me vëllezërit Afrimin, Brahimin dhe një grup bashkëluftëtarësh të përkushtuar, u ngritën përballë forcave serbe me breshëri zjarri, trimëri dhe besë, duke treguar se liria nuk negociohej dhe se Drenica ishte e pathyeshme. Në zjarrin e kësaj beteje, trimat shqiptarë jo vetëm që thyen ofensivën serbe, por shkaktuan humbje të drejtpërdrejta në radhët e tyre. Policia serbe, pasi humbi dy pjesëtarë, u kaplua nga paniku dhe u tërhoq me shpejtësi, duke e kuptuar se çdo hap i tyre në atë tokë të shenjtë mund të përfundonte në disfatë. Plagosja e 11-vjeçarit Baki Krasniqi, të cilin serbët e shënjestruan pa mëshirë, mbetet një plagë e rëndë e asaj dite, por edhe një dëshmi e qartë e barbarisë së tyre dhe e sakrificës që fëmijët dhe familjet shqiptare përjetuan në atë periudhë të errët. Megjithatë, ajo ditë solli një mesazh të fuqishëm: UÇK-ja ishte ngritur, Drenica nuk do të përkulej më kurrë, dhe komandanti Adem Jashari po udhëhiqte një epokë të re të lirisë. Beteja e Vajnikut është një ndër gurët themelorë të Epopesë së UÇK-së, një ditë kur guximi i një grushti luftëtarësh përballë një force shumëfish më të madhe e detyroi robërinë të kthehej mbrapsht dhe i paralajmëroi të gjithë se epoka e vjetër po shembej, ndërsa Kosova po lindte e re, e fortë dhe e pamposhtur.
