Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në një takim të organizuar në kabinetin e ministrit të Kulturës, Rinisë dhe Sportit, Kujtim Gashi, të marten u licencuan Federata e Motoçiklizmit të Kosovës dhe Federata e Triathlonit të Kosovës. Ministri Gashi priti në këtë takim kryetarët e këtyre Federatave Nuhi Llugaxhiun dhe Vedat Tërmkollin me të cilët nënshkroi edhe dy memorandume bashkëpunimi me qëllim të mbështetjes financiare të tyre nga ana e MKRS-së me nga 20 mijë euro.
Ministri Kujtim Gashi tha se ndihet i kënaqur me dhënien e licencave për këto dy federata dhe theksoi përkushtimin e tij për të plotësuar kushtet e nevojshme për çdo sport që zhvillohet në Kosovë dhe jo vetëm përmes dhënies së licencave për Federatat e reja por edhe përmes mbështetjes financiare për këto Federata. Kjo bëhet me qëllim të lehtësimit të punës dhe po ashtu edhe motivimit të Federatave dhe të rinjve për zhvillimin e aktiviteteve të ndryshme sportive”.
Nga ana tjetër, kryetari i Federatës së Motoçiklizmit, Nuhi Llugaxhiu dhe ai i Triathlonit, Vedat Tërmkolli, u shprehën të lumtur me dhënien e licencave dhe për nënshkrimin e memorandumeve të bashkëpunimit për çka edhe e falënderuan ministrin Gashi. Ata premtuan se do të angazhohen maksimalisht në zhvillimin e këtyre sporteve në vend dhe të talenteve të reja në këto dy sporte.
