Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Avokati Musa Damati ka shprehur pritjen e tij për një aktgjykim lirues ndaj ish-krerëve të UÇK-së, Hashim Thaçi, Kadri Veseli, Jakup Krasniqi dhe Rexhep Selimi, të cilët po mbahen në paraburgim në Hagë që nga viti 2020. Damati theksoi se proceset gjyqësore të kësaj natyre janë jashtëzakonisht komplekse dhe kërkojnë kohë të gjatë për shqyrtim të plotë, për shkak të volumit të madh të materialeve dhe natyrës së ndërlikuar të çështjeve. Sipas tij, në raste të tilla maratonike, trupat gjykues zakonisht marrin më shumë kohë për të analizuar çdo provë dhe argument, gjë që ndikon drejtpërdrejt në vonesën e shpalljes së aktgjykimit. Megjithatë, ai mbetet optimist për epilogun e procesit. “Unë si avokat pres që të shpallet një aktgjykim lirues për të gjithë ata që janë përballur tash e sa vite me drejtësinë ndërkombëtare në Hagë,” ka deklaruar Damati. Ai ka sqaruar gjithashtu se nuk ekziston një afat strikt për shpalljen e vendimit, pasi kjo varet nga dinamika e punës së trupit gjykues dhe kompleksiteti i lëndës. Duke folur për procedurat pas vendimit, Damati ka theksuar se çdo aktgjykim i shkallës së parë nuk është përfundimtar, pasi palët kanë të drejtë ankese në instancat më të larta të drejtësisë ndërkombëtare. Sipas tij, kjo e drejtë është thelbësore për të garantuar një proces të drejtë dhe të plotë gjyqësor. Kujtojmë se të katër të akuzuarit janë deklaruar të pafajshëm në paraqitjet e tyre të para në nëntor të vitit 2020, ndërsa aktakuza ndaj tyre ishte konfirmuar më 26 tetor të po atij viti nga Dhomat e Specializuara të Kosovës.
