Salla e Teatrit “Adriana” mbrëmë ishte e mbushur përplot me artdashës nga mbarë trojet shqiptare, ku u zhvillua programi zyrtar i Festivalit Folklorik të Këngës “Ferizaj 2025”. Para komunitetit artistik, familjarëve dhe publikut të gjerë, 13 garues(e) u prezantuan me këngët e tyre konkuruese.
Çmimi i Parë, “Hivzi Fazliu”, iu nda Olza Hashanit nga Nënkryetari i Komunës së Ferizajt, Lulzim Aliu.
Çmimi i Dytë u fitua nga Mersud Bajrami dhe u dorëzua nga Prof. Banush Imeri, ish-kryetar i Ansamblit “Kastriotët”.
Çmimi i Tretë iu dha Riola Hysës nga Mimoza Fazliu, e bija e Hivzi Fazliut.
Programi i mbrëmjes u shoqërua edhe nga pjesa artistike mbështetëse e AAKV “Kastriotët”, ku u prezantuan anekdotat e Muzafer Osmanit, performancat e lahutarit Nazmi Hajdari, solistit Alban Luzha dhe artistes së mirënjohur Fetije Terstena. Mbrëmja u përmbyll me interpretimin e këngëtares së afirmuar, Rrezarta Ramadani.
Juria e festivalit përbëhej nga Sami Piraj (kryesues), Lindita Isufi, Liridon Sadriu dhe Burim Krasniqi. Në arsyetimin e vendimit, Prof. Sami Piraj theksoi se të gjithë pjesëmarrësit ishin të nivelit të lartë, ndërsa diferencat mes fituesve i bënë disa detaje të vogla interpretative.
Organizatorët falënderuan ish-kryetarët e ansamblit, Drejtorinë e Kulturës, donatorët dhe udhëheqësit e ansambleve nga Kosova, Shqipëria dhe Maqedonia e Veriut për mbështetjen e vazhdueshme ndaj festivalit.
Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
