Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Partia Demokratike e Kosovës ka reaguar ashpër ndaj shtyrjes së shpalljes së aktgjykimit në procesin gjyqësor ndaj ish-krerëve të Ushtria Çlirimtare e Kosovës, që po zhvillohet në gjykaten speciale me seli në Hagë. Në një deklaratë zyrtare, PDK vlerëson se vonesat e njëpasnjëshme në këtë proces përbëjnë një cenim serioz të parimeve të drejtësisë dhe rrezikojnë të minojnë besimin publik në drejtësinë ndërkombëtare. Sipas këtij subjekti politik, zvarritja e procedurave ka tejkaluar çdo afat të arsyeshëm dhe po krijon perceptimin e një procesi të ndikuar nga faktorë jashtëgjyqësorë. PDK thekson se paraburgimi i zgjatur i të akuzuarve, që tashmë ka arritur rreth pesë vite e gjysmë, po shndërrohet në një formë dënimi të heshtur, për shkak të mungesës së një vendimi përfundimtar. Kjo situatë, sipas PDK-së, përbën jo vetëm padrejtësi ndaj të akuzuarve, por edhe një standard shqetësues për praktikat e drejtësisë ndërkombëtare. PDK i ka bërë thirrje bashkësisë ndërkombëtare dhe institucioneve përkatëse që të ndërmarrin hapa konkretë për të garantuar një proces të drejtë, të paanshëm dhe të përfunduar brenda një afati të arsyeshëm. Në të njëjtën kohë, ajo ka ritheksuar qëndrimin e saj për pafajësinë e ish-krerëve të UÇK-së, duke kërkuar që vendimi të shpallet pa vonesa të mëtejshme.
