Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Partia Demokratike e Kosovës do të mbajë sot mbledhjen e Kryesisë së partisë, e cila pritet të nisë në orën 13:00, në një moment të rëndësishëm politik për vendin, teksa vazhdojnë diskutimet për zgjedhjen e presidentit të ri të Kosovës. Kjo mbledhje zhvillohet në një periudhë kur ende nuk ka një skenar konkret për emrin që do të marrë postin e shefit të shtetit, ndërsa partitë politike kanë afat deri më 4 mars për të gjetur një zgjidhje dhe për të shmangur zgjedhjet e reja që do të pasonin në rast të dështimit të procesit. Presidentja aktuale, Vjosa Osmani, ka shprehur publikisht gatishmërinë për një mandat të dytë, por deri më tani nuk duket të ketë pajtueshmëri të plotë politike rreth kandidaturës së saj, madje as brenda GUXO, subjekt që ajo e kishte themeluar më herët. Nga Lëvizja Vetëvendosje dhe GUXO kanë deklaruar se aktualisht nuk i kanë votat e nevojshme për zgjedhjen e presidentit, duke theksuar se mungojnë të paktën 15 vota për sigurimin e shumicës së kërkuar. Kryeministri Albin Kurti ka bërë të ditur se për zgjedhjen e presidentit kërkohet mbështetja e opozitës, ndërsa në këtë drejtim ka zhvilluar takime edhe me kryetarin e LDK-së, Lumir Abdixhiku, si dhe me nënkryetarin e PDK-së, Bedri Hamza. Zhvillimet e sotme në PDK pritet të japin sinjale të reja politike lidhur me qëndrimin e opozitës ndaj procesit të zgjedhjes së presidentit dhe mundësinë e arritjes së një konsensusi institucional.
