Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Edhe në përpjekjen e 45-të me radhë, deputetët e Kuvendit të Kosovës nuk arritën pajtueshmëri për konstituimin e legjislaturës së re. Seanca e radhës u karakterizua nga tensione të njëjta si në takimet e mëparshme, me refuzimin e vazhdueshëm të kryesuesit Avni Dehari për të zbatuar aktgjykimin e Gjykatës Kushtetuese, i cili përcakton votimin e fshehtë për zgjedhjen e kryetarit të Kuvendit. Dehari, që vjen nga Lëvizja Vetëvendosje, ndërpreu sërish fjalimet e deputetëve të opozitës, përfshirë ata të PDK-së, LDK-së dhe AAK-së. Në një moment, ai urdhëroi ndërprerjen e mikrofonit të deputetit të PDK-së, Abelard Tahiri, pasi ky i fundit e akuzoi publikisht për shkelje të Kushtetutës. “Sot është hera e 45-të që kryesuesi po e shkel Kushtetutën. Kjo është e papranueshme”, deklaroi Tahiri para se t’i ndërpritej fjala.
Propozimi i Vetëvendosjes për të formuar një komision për zgjedhjen e kryetarit të Kuvendit mori vetëm 55 vota, pa vota kundër apo abstenime – duke qenë kështu i pasuksesshëm. Pas dështimit të votimit, Dehari ndërpreu seancën, duke paralajmëruar se përpjekja e radhës për konstituim do të bëhet të dielën, më 14 korrik, në ora 11:00. Përplasjet e sotme e shtojnë krizën institucionale në vend, ndërsa zvarritja e konstituimit po ngjall shqetësim të madh publik e ndërkombëtar.
