Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Avokati i ish-presidentit Hashim Thaçi, Pierre Richard Prosper, ka nisur fjalën përfundimtare në Hagë me kritika të forta ndaj Zyrës së Prokurorit të Specializuar (ZPS), duke vënë në dukje trajtimin që kjo e fundit u ka bërë dëshmitarëve ndërkombëtarë të mbrojtjes. Prosper tha se komente dhe qëndrime të tilla tregojnë arrogancë dhe mungesë respekti për profesionistët që kanë qenë të pranishëm në terren dhe kanë ofruar dëshmi të bazuara në përvojën e tyre. Ai përmendi një situatë personale me një koleg diplomat, i cili ishte i tronditur nga mënyra se si ZPS i hodhi poshtë deklaratat përmbyllëse të dëshmitarëve ndërkombëtarë, duke e cilësuar këtë si një gjest dëshpërimi dhe injorance. Prosper theksoi se dëshmitarët nuk kanë folur si individë privatë, por kanë paraqitur informacione të verifikuara nga institucionet që përfaqësojnë, përfshirë SHBA-në, Britaninë, NATO-n dhe Kombet e Bashkuara. Ai shtoi se këndvështrimet e tyre ishin të bazuara në përvojë të drejtpërdrejtë, raporte nga terreni dhe analiza të organizatave civile dhe ushtarake. Avokati i Thaçit kritikoi ZPS-në për injorancë dhe përbuzje të ekspertizës profesionale të dëshmitarëve ndërkombëtarë, duke e cilësuar këtë sjellje si të papranueshme në një proces gjyqësor që kërkon standardin më të lartë të besueshmërisë dhe respektit ndaj provave.
