Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-komandanti i UÇK-së në Llap dhe ish-deputeti i Kuvendit të Kosovës, Rrustem Mustafa, ka drejtuar kritika të ashpra ndaj kryeministrit Albin Kurti dhe Qeverisë së Kosovës, duke i akuzuar për thellim të krizës sociale përmes rritjes së çmimit të energjisë elektrike dhe kostos së jetesës. Mustafa ka deklaruar se rritja e vazhdueshme e çmimeve të energjisë nuk është thjesht çështje ekonomike, por “goditje në zemrën e familjeve” që mezi përballojnë muajin. Sipas tij, qytetarët po përballen me fatura dhe çmime në rritje, ndërsa mbështetja institucionale mbetet simbolike dhe e pamjaftueshme. Ai ka theksuar se Kurti, dikur në opozitë, fliste fuqishëm kundër padrejtësive sociale, por sot në pushtet, sipas Mustafës, po i toleron dhe po i thellon ato. “Liria nuk u fitua që sot njerëzit të jetojnë me frikë nga faturat”, ka shkruar ai, duke shtuar se ndihmat e vogla financiare nuk e zgjidhin problemin e rritjes së përgjithshme të çmimeve. Mustafa i ka bërë thirrje kryeministrit për reflektim të menjëhershëm, duke paralajmëruar se humbja e shpresës së qytetarëve sjell edhe humbjen e besimit dhe mbështetjes ndaj qeverisjes. Ai ka akuzuar ekzekutivin se po e rëndon jetën e qytetarëve dhe se politikat aktuale nuk po e mbrojnë shtresën më të prekur të shoqërisë. Sipas tij, zhvillimi nuk arrihet me retorikë, por me vendime konkrete në mbrojtje të mirëqenies së qytetarit.
