Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Analisti dhe veprimtari politik Sadik Halitjaha ka reaguar ndaj politikave të Qeverisë shqiptare për investitorët strategjikë, duke shprehur shqetësimin se turizmi bregdetar po bëhet gjithnjë e më i papërballueshëm për qytetarët me të ardhura të ulëta. Sipas tij, gjatë viteve të fundit çmimet në bregdet janë rritur ndjeshëm, duke bërë që një pjesë e madhe e popullsisë të mos ketë më mundësi të kalojë pushimet në det. Halitjaha vlerëson se favorizimi i investitorëve strategjikë dhe zhvillimi i ashtuquajtur “turizëm elitar” po kufizojnë qasjen e qytetarëve në hapësirat publike bregdetare. Ai kërkon standardizimin e çmimeve të akomodimit dhe të shërbimeve turistike, përmirësimin e kushteve në plazhe, si dhe mbikëqyrje më të madhe të cilësisë së shërbimeve që u ofrohen pushuesve. Në reagimin e tij, Halitjaha shpreh shqetësim edhe për shitjen dhe dhënien në shfrytëzim të zonave bregdetare, duke theksuar se zhvillimi ekonomik duhet të jetë në interes të qytetarëve dhe të ruajë pronën, identitetin dhe interesat kombëtare. Ai e përmbyll reagimin me thirrjen për mbrojtjen e pasurive natyrore të vendit dhe për një zhvillim turistik që, sipas tij, të jetë i qasshëm për të gjithë qytetarët.
