Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sot , në Besianë të Llapit, zbulohet shtatorja e Simbolit të Lëvizjes Kombëtare, Adem Demaçi. Në zbulimin e shtatores do të marrin pjesë familjarë, autoritete të larta të vendit dhe të komunës së Besjanës. Manifestimi për këtë ngjarje të rëndësishme kulturore, fillon në ora 13.00.
Adem Demaçi u lind në maj të viti 1935, por zyrtarisht babai i tij Zeqiri e regjistroi më 26. 2. 1936. Që pas mbarimit të shkollës Demaçi ishte pjesë e organizatave, të cilat kundërshtonin shpërnguljen masive nën dhunë të shqiptarëve për në Turqi dhe diskriminimin e tyre. Ai dënoi publikisht aksionin e mbledhjes së armëve vetëm të shqiptarëve, aksion represiv që ishte ushtruar në dimrin e viteve 1955 – 1956, në Kosovë. Në pranverën e vitit 1958, në revistën letrare me emër “Jeta e re“ falë guximit dhe përkujdesjes së poetit Esad Mekuli, në dy numra, u botua romani i tij “Gjarpinjtë e gjakut”. Më 19. 11. 1958, u arrestua nga UDB-ja në Prishtinë, dhe pas disa muajsh në hetuesi, doli para Gjyqit të Qarkut, ku u dënua 5 vjet burg. Në vitin 1963 themeli organizatën, “Lëvizja Revolucionare për Bashkimin e Shqiptarëve”, e cila kishte shtrirë aktivitetin në Kosovë, Maqedoni e Mal të Zi. Në vitin 1964 u burgos dhe u dënua 15 vjet burg. Në vitin 1974 u dënua për herë të tretë, 15 vjet burg. Pas daljes nga burgu ku ishte mbajtur 28 vite, në vitet 90 u zgjodh kryetar i Këshillit për Mbrojtjen e të Drejtave dhe Lirive të Njeriut, me qendër në Prishtinë. Gjatë luftës së UÇK-së ishte zëdhënës i Përgjithshëm i saj.
Adem Demaçi është nderuar me çmimet:
“Urdhëri hero i Kosovës” në vitin 2010.
Çmimi Saharov për Lirinë e Mendimit, në vitin 1991
Çmimi për të Drejtat e Njeriut në Universitetin e Oslos, 1995.
Adem Demaçi ka qenë edhe shkrimtar, poet e publicist i njohur. Në vitin 2012, në Prishtinë u botua kompleti veprave të tij në 10 vëllime i financuar nga Qeveria e Kosovës.
U nda nga jeta, më 26 korrik të vitit 2018.
