Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Sekretarja e përgjithshme e Partisë Demokratike të Kosovës (PDK), Vlora Çitaku, ka mirëpritur publikisht kandidimin e Bedri Hamzës për kryetar të partisë, duke e cilësuar këtë si një sinjal të qartë për unitet dhe konsolidim të brendshëm në PDK. “PDK është familja jonë dhe së bashku do ta hapim kapitullin e ri të fitoreve,” shkroi ajo, teksa shpërndau njoftimin e Hamzës, duke e theksuar se partia po hyn në një fazë të re bashkimi dhe reflektimi pas dorëheqjes së Memli Krasniqit. Bedri Hamza zyrtarizoi të enjten kandidaturën për kryetar të PDK-së, një ditë pas dorëheqjes së Memli Krasniqit nga kjo pozitë. Krasniqi, në intervistën e tij të mërkurën, shfaqi mirëkuptim për garën e brendshme, duke theksuar se mbështet plotësisht Hamzën dhe duke nënvizuar se në parti duhet të mbizotërojë fryma e bashkëpunimit. Megjithëse nuk e përmendi drejtpërdrejt çështjen e tensioneve të fundit në degën e Drenasit, Krasniqi la të kuptohet se nuk ka hatërmbetje dhe se procesi i ri zgjedhor brenda PDK-së duhet të shërbejë si moment bashkimi. Kandidatura e Bedri Hamzës dhe mbështetja publike nga figura kyçe si Vlora Çitaku po interpretohen si fillimi i një faze të re për PDK-në, e cila synon rikthimin e unitetit dhe përgatitjen për garat e ardhshme politike.
