Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në një takim që ngjalli tension diplomatik në Beograd, presidenti i Serbisë, Aleksandar Vuçiq, është përplasur me shefin e Zyrës së Bashkimit Evropian në Serbi, Andreas von Beckerath. Ky i fundit ia dorëzoi Vuçiqit Raportin e Progresit, por vëmendjen e mediave e mori momenti kur zyrtari evropian kërkoi llogaridhënie për autorët e sulmit të armatosur në Banjskë. Andreas theksoi se Serbia duhet të zbatojë plotësisht marrëveshjet e vitit 2023 dhe të sigurojë që përgjegjësit për ngjarjet në veri të Kosovës të vihen para drejtësisë. Ai kujtoi se normalizimi i marrëdhënieve me Kosovën është çelësi për stabilitetin rajonal dhe përparimin evropian të Serbisë. Por Vuçiq reagoi me tone të ashpra. Ai kundërpërgjigj se pret që BE-ja të kërkojë drejtësi edhe për “ngjarjet nga viti 2008 deri në fund të vitit 2025”, ku sipas tij “serbët janë vrarë, plagosur e arrestuar pa të drejtë”. Ky reagim, që synon ta zhvendosë përgjegjësinë nga Serbia te palët e tjera, u pa nga analistët si tentativë për të shmangur presionin ndërkombëtar. Përplasja mes Vuçiqit dhe përfaqësuesit të BE-së shënon një tjetër pikë tensioni në marrëdhëniet e Brukselit me Beogradin, në një kohë kur Bashkimi Evropian po kërkon qartësi, transparencë dhe ndëshkim të autorëve të sulmit të Banjskës – ngjarje që tronditi Kosovën dhe rajonin. Ky zhvillim tregon se rruga e Serbisë drejt integrimit evropian mbetet e vështirë dhe e ndërlikuar, për sa kohë që drejtësia për Banjskën nuk merr epilogun e kërkuar nga BE-ja.
