Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Në gjykatën speciale në Hagë, është konfirmuar se gjenerali amerikan Wesley Clark do të fillojë dëshminë e tij të hënën, më 17 nëntor, duke nisur nga ora 12:00. Ky vendim i trupit gjykues shënon një ndër dëshmitë më të rëndësishme në fazën përfundimtare të mbrojtjes në procesin kundër Hashim Thaçit, Kadri Veselit, Rexhep Selimit dhe Jakup Krasniqit. Dëshmia e Clarkut do të zgjasë deri të mërkurën, më 19 nëntor, ndërsa pas saj do të mbahet edhe një konferencë për ecurinë e çështjes. Në këtë fazë të procesit, mbrojtja është duke paraqitur provat e saj, pas përfundimit të dëshmive të një sërë ish-zyrtarësh të lartë amerikanë dhe ndërkombëtarë, përfshirë Christopher Hill, James Rubin e Paul Williams. Ndërkohë, më 14 nëntor është planifikuar përmbyllja e çështjes së mbrojtjes, ndërsa parashtresat përfundimtare dhe deklaratat e viktimave do të dorëzohen deri më 22 dhjetor. Gjykimi në Hagë, i cili po ndiqet me interes të madh publik e politik, pritet të hyjë në fazën e fundit brenda këtij viti, duke përmbyllur një prej kapitujve më të ndjeshëm të drejtësisë ndërkombëtare për Kosovën.
