Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Dëshmia e juristit amerikan Paul Williams në Hagë ka hedhur dritë mbi një nga pyetjet kyçe të historisë politike të Kosovës: pse delegacioni shqiptar në Rambuje u udhëhoq nga Hashim Thaçi, e jo nga Ibrahim Rugova apo Bujar Bukoshi. Williams theksoi se kjo nuk ishte një zgjedhje rastësore, por një domosdoshmëri politike dhe strategjike, pasi UÇK-ja përfaqësonte “dimensionin kyç të fabrikut politik të Kosovës” dhe ishte realiteti që as ndërkombëtarët nuk mund ta injoronin. Ai tregoi se presidenti Ibrahim Rugova, megjithëse një figurë historike e pacifizmit dhe pavarësisë, shihej nga ndërkombëtarët si i kufizuar në dialog, sepse “çdo fjali e tij fillonte dhe përfundonte me: pavarësi dhe jo-përdorim i forcës”. Sipas Williams, kjo krijonte frustrim të madh tek ndërmjetësit ndërkombëtarë, të cilët kërkonin një palë negociuese që pasqyronte realitetin në terren dhe dimensionin e armatosur të lëvizjes. Në këtë kuadër, emri i Thaçit dhe UÇK-së nuk ishte vetëm një zgjedhje e brendshme, por një reflektim i “kaleidoskopit politik” të kohës. Ndërkombëtarët e shihnin të pamundur negociimin me vetëm “institucionalistët” si Rugova apo Bukoshi, pa përfshirë aktorët e armatosur që ishin shndërruar në faktor përcaktues të lëvizjes kombëtare shqiptare.
