Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Ish-nënkryetari i Kuvendit të Kosovës, Xhavit Haliti, ka komentuar situatën e krijuar pas shpërbërjes së Kuvendit dhe të drejtën e kryeparlamentarit në detyrë, Dimal Basha, për të marrë pjesë në ceremoni zyrtare. Haliti tha se “deri në themelimin e Kuvendit të ri, Dimal Basha mbetet kryetar, dhe nënkryetarët kanë mandat të njëjtë si kryetari”. Megjithatë, ai e konsideron këtë situatë problematike dhe jo në përputhje me praktikat e vendeve demokratike. “Që realisht është gabim dhe në kundërshtim me praktikat demokratike,” potencoi Haliti, duke shtuar se mandati i deputetëve nuk duhet ndërprerë menjëherë pas shpërbërjes, por të vazhdojë deri në konstituimin e legjislaturës së re. Sipas tij, kjo është e nevojshme për të përballuar situata të rëndësishme shtetërore, si miratimi i marrëveshjeve ndërkombëtare, shpallja e gjendjeve të jashtëzakonshme, ose dhënia e autorizimeve shtesë qeverisë dhe presidentit. Haliti ka theksuar gjithashtu se ndryshimet ligjore janë të domosdoshme për të qartësuar këtë periudhë tranzicioni: “Ligji dhe rregullorja duhet të ndryshojnë,” tha ai. Ai paralajmëroi gjithashtu rreziqet e keqpërdorimit të resurseve institucionale gjatë kësaj periudhe: “Kryesia aktuale i mban të gjitha kompetencat deri në konstituimin e Kuvendit të ri. Përdorimi i infrastrukturës së Kuvendit — veturave, këshilltarëve, buxhetit, karburanteve dhe fuqisë së Kryetarit — në këtë kohë mund të konsiderohet keqpërdorim dhe korrupsion,” përfundoi Haliti.
