Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Radmila Shekerinska, Zëvendëssekretarja e Përgjithshme e NATO-s, ka folur për situatën në Kosovë dhe rolin e dialogut ndërmjet Prishtinës dhe Beogradit, duke theksuar se ky proces është thelbësor për trajtimin e çështjeve të ndjeshme rajonale. Sipas saj, NATO i ka bërë thirrje të dyja palëve të angazhohen më intensivisht në dialogun e udhëhequr nga Bashkimi Evropian, duke nënvizuar se fokusimi në dialog është më efektiv sesa komentimi i deklaratave politike. “Si një aleancë shumë e fuqishme politike dhe ushtarake, ne përpiqemi të përmbahemi nga komentimi i deklaratave të politikanëve. Jemi të pranishëm dhe mbështesim misionet e KFOR-it sepse siguria në rajon është thelbësore. Ajo ndikon jo vetëm në vendet e rajonit dhe qytetarët, por edhe në stabilitetin e aleancës. Jemi aty për të garantuar sigurinë e të gjitha komuniteteve në Kosovë dhe lirinë e lëvizjes së tyre,” tha Shekerinska. “Ne kemi kërkuar Beogradit dhe Prishtinës të angazhohen më shumë në dialogun e udhëhequr nga BE-ja. Kjo është receta – në vend të komentimit të deklaratave, thelbësore është të angazhohemi në një dialog që trajton çështjet e vështira dhe të sigurohemi që të gjitha marrëveshjet e mëparshme të respektohen dhe zbatohen,” u shpreh numri dy i NATO-s. Shekerinska nënvizoi se angazhimi i dyanshëm në dialog është vendimtar për ruajtjen e stabilitetit dhe paqes në Kosovë dhe në Ballkanin Perëndimor.
