Radio Kosova e Lirë Radio-Kosova e Lirë, Radio e luftës çlirimtare, paqes dhe bashkimit kombëtar, Zëri i lirisë, besnikja e pavarësisë dhe e bashkimit të shqiptarëve.
Tema të tjera...
Rezultatet përfundimtare të zgjedhjeve të 28 dhjetorit kanë nxjerrë qartë nivelin e pëlqyeshmërisë së liderëve partiakë brenda elektoratit të subjekteve që ata udhëheqin. Të dhënat tregojnë dallime të theksuara në mbështetjen që kryetarët e partive kanë marrë nga votuesit e tyre. Në këtë aspekt, më së miri qëndron kryetari i Aleancës për Ardhmërinë e Kosovës, Ramush Haradinaj. Nga rreth 52 mijë vota sa ka marrë AAK-ja, Haradinaj ka siguruar 44 mijë vota, apo 84.62 për qind të elektoratit partiak. Pas tij renditet kryetari i Partisë Demokratike të Kosovës, Bedri Hamza. Nga 192 mijë vota sa ka marrë PDK-ja, Hamza është votuar nga 162 mijë qytetarë, që përbën 84.38 për qind të votave të partisë. Në vendin e tretë është lideri i Lëvizjes Vetëvendosje (LVV), Albin Kurti. Sipas rezultateve preliminare të Komisionit Qendror të Zgjedhjeve, Kurti ka marrë 404 mijë vota nga 487 mijë sa ka marrë LVV-ja gjithsej, që përkthehet në një përqindje më të ulët të pëlqyeshmërisë krahasuar me Haradinajn dhe Hamzën. Ndërkohë, më së dobëti në këtë renditje qëndron kryetari i Lidhjes Demokratike të Kosovës, Lumir Abdixhiku. Nga 126 mijë vota sa ka marrë LDK-ja, Abdixhiku ka siguruar 88 mijë vota, apo 69.84 për qind të elektoratit të partisë së tij.
